20211217_093254.jpg

Tocante Juri

Mi nomber completo ta Jurisky Anchela Geerman. Mi ta nací na Aruba riba 9 juli 1984. Mi ta un Highly Sensitive Person (Persona Sensitivo di Halto Grado). Esaki kermen cu, compara cu mayoria otro hende, ami por percivi informacion mas subtilmente y mi ta procesa e informacion aki mas profundo. Mi cualidad central ta den contacto. Mi por perciví den ki areanan falta (relativamente mas) contact den hende. Y e parti sensitivo di e cualidad aki ta ora nó tin contact (of falté).

 

Mi ta haya esaki fastioso y den transcurso di aña y mi propio desaroyo, mi a bin ta experiencia "falta di contact" menos y menos fastioso door di bai p'aden di mi mes, y haci contact cu mi. Tin biaha, depende di e situacion, mi ta logra den e momento y mi no ta laga mi mes los. Tin biaha ainda mi ta laga mi mes los un poco pero ta haya mi mes hopi liher back compara cu antes. Mi cualidad, ý su sensitividad ta hacimi bon den mi trabao como Personal Life Guide/ Spiritual Psychologist. Pasobra mi por mira y scucha un individuo (organisacion) y situacionnan hopi subtil y profundo, y especialmente pues unda falta contact.

 

Y na mes momento, esaki no ta bai bon, si ami no cuida bon di mi mes. Y esaki kermen cu mi tin di tene cuenta cu e tempo y espacio cu mi mester pa procesa informacion. Y tambe e kermen cu mi tin di tene cuenta cu mi necesidad básico di ta den atmosferanan cu ta conectá cu mi: ambientenan unda cu hendenan pór tene cuenta cu mi, por ta subtil tambe. Y ya cu esaki no ta e realidad general, ami mes tin cu zorg pues pa crea e ambientenan aki. Por ehempel door di comunica bon cu otronan. Y esaki ta logra mayoria biaha, contal cu mi ta bon den contacto y pues primordialmente tin un bon comunicacion cu mi mes. 

Mi palabra di awo y semper ta: "afstemming" (of "attunement" of "alinea", "personalisá" - mi mes ta conectá hopi bon cu e significado na Hulandes).

 

-------------------

Semper mi kier a traha cu hende y guia. Pero mi no tabata sa con pa haci esaki. Mi n'í tabata sa kiko guia eigenlijk kermen. Pero hende a keda interesami. Prome mi tabata interesá den un forma negativo en realidad. Mi tabata puntra mi mes dicon nos ta haci manera nos ta haci, dicon nos ta comporta manera nos ta comporta y tambe con bida ta hinca den otro. Mi tabata gusta procesonan, maske mi no tabata compronde nada di nan. 

Esaki, toch basta inconscientemente, cu 18 aña a hibami na studia Biologia, cual ta e estudio di bida en general. Na RijksUniversiteit di Groningen na Hulanda, mi a haal mi Propedeuse y Bachelors den Biologia y na 2008 finalmente mi a caba mi estudio den Biologia Medicinal cu specialisacion den Immunologia. Immunologia ta e taki di Biologia mas specifico den e mechanismo di proteccion di nos curpa. Mi tabata stima con nos curpa ta hinca den otro y con e ta traha, protegiendo nos. Mi a hasta soña un biaha cu mi tabata un virus y con mi ta purba pasa e barreranan protectivo di un curpa. Zuiver!

Toch, apesar di mi fascinacion cu nos curpa fysico, mi tabata haya falta di e otro aspectonan di nos curpa, esta e partinan no fysico, psychologico y emocional. Circumstancianan di bida tambe a haci cu na 2005 mi mester a cuminsa traha riba hustamente e partinan aki di mi mes, pa mi salud. Na finales di 2005 mi a dicidi di cuminsa studia Psychologia Spiritual, cual despues di tempo a cambia nomber pa Biba Consciente (Bewust Leven, un opleiding cu ta CRKBO geregistreerd na Hulanda). Door di esaki mi apetito pa compronde mi mes y otronan a cuminsa wordo satisfacé y mi tabata sintiendo cu esaki ta mi caminda.

Ora mi a caba Biologia Medicinal na 2008, mi a wordo ofreci un posicion na Erasmus Medisch Centrum na Rotterdam pa haci mi doctorado (PhD). E tabata un desicion dificil, pero mi por a sinti cu e caminda ey lo no brindami di bida, locual cu mi écht mester. Si, e tabata tin di ver cu bida berdad, pero na e momento ey mi mester a haya mas conocimento di e systema no fysiconan di nos curpa. Pues mi a dicidi, cu mi kier traha cu hende mas directamente, mientras mi ta continua mi estudio di Biba Consciente.

Esaki a hibami na traha prome den e industria farmaceutico como Coordinadora di Estudionan Clinico. Despues mi a purba studia Verpleegkunde mientras mi tabata traha den Psychiatria. Esaki lastimamente a bira dimas p'ami apesar cu mi tabata bon aden. Mi mester a deal cu hopi agresividad, mientras tanto cu mi tabata trahando riba ami. E ora mi a dicidi cu ami mester bai prome cu otro hendenan y mi a stop. Despues di esaki mi a bira Begeleider den Ziekteverzuim. Kinan mi a haya e oportunidad pa siña mas ainda di kiko guia kermen, esaki tabata leuk. Den e 7 aña nan siguiente mi a fungi den e funcion aki, conosiendo hende for di mas serca, kiko ta motiva nan y con nan comportamiento ta. 

Tambe mi ta un persona cu gusta arte y ta creativo. Mi a haya un oportunidad na 2016 pa guia muchanan durante lesnan di arte, y di esaki mi a haci mi prome negoshi na Hulanda como Atelierista, banda di mi otro trabao. E inteligencia natural y cualidad cu e muchanan tabata brindami, a enrikesé mi bida un montón significante. Mi a siña di e forma aki primera mano hopi mes di kiko ta naturalesa humano, y mi a bin den contacto cu un otro nivel di actitud habrí, curiosio y investigativo, trahando cu e chikitinnan y nan parientenan den e lesnan. Mientrastanto mi a termina mi estudio di Biba Consciente caba y door cu toch ainda mi tabata hambrá pa mas profundidad, mi tabata haciendo e pa un di 2 biaha.

 

Na fin di 2017 mi a caba Biba Consciente atrobe y mi tabata contemplando seriamente pa bin bek Aruba. Y na fin di aña 2018 mi a regresá na mi isla natal. Mi plan tabata pa tuma un sabático di minimo 1 aña, y for di trankilidad dicidi kiko mi lo haci verder cu mi bida. Dentro di 3 luna di trankilidad berdadero na Aruba sin embargo, mi a skirbi ful un plan y a descubri y dicidi cu mi lo cuminsa riba mi mes cu Inner Work Aruba. Y aworaki, mi ta dunando tur loke mi por pa mi por realisá mi soño di ta un "Heart-Centered Entrepeneur" cu ta guia hendenan door di e transformacion cu ta resultá den desaroyo personal y profesional.

Inner Work Aruba ta pues un lugar cu mi a crea unda cu mi pasion pa bida, e bida fysico y bida no fysico for di mi experiencianan, creatividad hunto cu curiosidad y gana di sigui desaroya ta topa otro pa asina brinda mi clientenan un espacio sumamente nutritivo, jen di atencion pa bo ser, jen di bida, pa bo por florece den esun di bo, den e sentido mas amplio di e palabra, djies door di cuminsá cu bo mes.

 

Door di mi mes un experiencia cu dificultadnan di bida y sobrepasá esakinan, mi cualidad den haci contacto profundo cu hende y mi interes genuino den hende y pa bida, mi ta ofrese un bon oido na bo persona y un espacio "safe" pa bo por relaha y atende cu abo. E ta mi intencion cu mientras bo ta bou mi guia, bo ta sintibo cargá y caluroso den un mantel mientras toch bo ta ricibi feedback directo for di mi, pa asina bo por crese y desaroyá for di akinan. Y cu bo por hiba e forma aki y hacié di bo mes. Pesey mi deseo profundo ta pa yudabo "heal" (desaroyá) y siñabo cu bo pór duna bo mes atencion, jega na mas y mas contacto cu bo mes door di siña mira, scucha y take care di bo mes. Y for di akinan, contacto cu otronan, y bida. Sintiendo bo mas y mas satisfecho, completo apesar di realidad di bida y juist mirando con esaki por ta un spiel pa yuda abo desaroyá. 

Abo ta bale la pena duna bo mes atencion! 

Bo ta calurosamente bon biní! ☺

Saludos cordial,

Juri ♥

drs. Jurisky A. Geerman

Personal Life Guide - Spiritual Psychologist

ps: Pa mas detaye acerca di mi carrera klik riba e link aki: https://www.linkedin.com/in/jurisky-a-geerman-12b11915/