Zoeken
  • innerworkaruba

Bo valentino berdadero ta abo



E ta romantico kisas pa pensa cu tin un otro persona eyfo cu ta completá nos, cu ta nos mitá. Sin dje nos no por biba, ta wordo cantá den jen di cantica y ta e ilusion cu hopi di nos ta den dje of na algun punto di nos bida tabata aden. Y ora nos echt para kieto na kiko e ideanan aki di berdad ta mustra, e realidad creá ta uno unda un persona den e relacion méster di hopi cos y e otro, esun cu - no mag kies p'e - pero méster dune. Anto e saki nos ta jama amor. Pero, nos mester di un otro pa nos ta completo y feliz?

Den cierto sentido si. Interaccionnan y relacionnan di tur typo por ta arenanan unda nos por siña conose nos mes mihor. Hendenan di e forma aki por fungi como un spiel pa nos y mustra nos cosnan di nos mes, cu riba nos mes nos lo no a mira. Interaccion cu otronan pues ta sumamente importante pa nos por desaroya debidamente. Y esaki ta pasa tambe, tanten cu nos ta habrí pa mira kiko ta wordo mustra na nos mes over di nos mes, door di un otro. Y e transformacion cu ta resulta di esaki, ta haci nos sinti mas completo y feliz.

E problema ta cuminsa na e momento cu nos ta kere y spera - mastanto inconscientemente - cu un otro tey - solamente - pa jena nos. Cu nos ta pensa y tur nos actuacionnan ta den liña cu e pensamento cu e otro persona ta basicamente existi solamente pa haci nos feliz. Y esey ta receta pa desaster. Ora e persona, mastanto esun mas saludabel den e relacion, ta coi su caminda y zorg pa su mes - e otro ta sinti su mes abandoná, jaloers y rabiá. Cual riba su mes lo no ta erg, pero como e no a siña pa zorg pa su mes ora e tin e typo di dolornan aki, e ta keda warda pa e otro y demandá pa e bin cuida di dje. Y n'i maske cuanto e otro persona, banda di haci su mes feliz, tog ta purba di dun'e atencion, n'i maske con lief e por ta, e otro persona lo no hay'e suficiente. Y e nó ta suficiente, pasobra falta e atencion di e persona pa cu su mes!

No tin ningun otro hende cu tin e responsabilidad - e deber - kisas n'i e capacidad pa (siña) conocebo asina íntimamente manera bo ta desea, cu abo. No tin tampoco ningun persona cu por proveé pa bo na e manera cu abo mes por (siña) hacié. Den e realidad aki, e momento cu un otro no por tey p'abo, pasobra e tin su mes un agenda y mester take care di su mes, a lo menos ABO tey p'abo. Y tur 2 por - kies - pa tey pa otro, enves di demandá pa tey pa otro. E alternativa ta un relacion egoista unda cu un persona no mag, n'i por ta su mes, sino méster ta loke abo kier pa e ta, pa bó supuesto bienestar pues acosto di esun di dje. El a bira un posesion, y asina a perde libertad. Y esey no ta amor.

E no ta amor tampoco pasobra abo, cu kier poseé, ta kere erroneamente y ta bisando bo mes cu bo no tin e poder pa stima y cuida bo mes, pues un otro tin cu hacie. Haciendo bo mes dependiente di un otro y faltando bo mes asina ki respet. Especialmente concerniendo emocionnan nos ta faya hopi biaha den esaki sin realisa. Nos no ta kere cu nos por cuida nos mes ora nos tin dolor, y nos kier pa e otro ta nos mihor amigo of duna e cariño cu falta. Pero mientras tanto p'aden di nos, nos mes ta trata nos mes manera un ser insignificante, maltratando nos mes cu palabranan y otro cosnan ora nos ta sinti. Awch!

Pero no ta nada. Nos tur ta haci fout. Y di foutnan nos por siña. Conosiendo nos mes mihor por medio di trabao interno, nos por siña con si nos por cuida di nos mes debidamente y experiencia cu di berdad nos por. Y den un relacion cu un otro, mira nos mes pa siña cuida di nos mes. Pa asina nos no tin cu exihi nada di ningun otro persona y no méster di nan pa ta feliz. Sino ta den pleno intimidad cu nos mes. Y ora nos haya e amor y cariño for di un otro, nos curason ta "overflow" di amor y nos por acepté, pasobra nos ta reconose y no miré como algo straño. Y nos ta sinti nos mes berdaderamente mirá, cargá y stimá. Pasobra nos a mira nos mes como nos berdadero valentino. Y asina por mira e otro tambe como e gran amor cu e ta, reflehando nos nos mes como e gran amor aki tambe. For di su mes, sin ningun mester.

Cu cariño,

Juri



13 weergaven0 opmerkingen

Recente blogposts

Alles weergeven