Zoeken
  • innerworkaruba

Comprondiendo nos mes un poco mas den tempo di crisis

https://www.bondia.com/jurisky-geerman-comprondiendo-nos-mes-un-poco-mas-den-tempo-di-crisis/


Los di e crisis cu nos ta pasando aden na e momentonan aki, nos no ta custuma pa presta atencion na nos mundo interior. Mi ta referí cu esaki na nos emocionnan y nos sentimentonan por ehempel. Esaki, mientras cu e aspectonan aki e.o. aspectonan di nos interior (nos p'aden), tin hopi efecto riba con nos ta comportá (actua, haci) den nos bida diario, y cual ta mustra di ta manera "magnified" awor den temporada di crisis. Pesey mi kier toca e tema di emocionnan y nan efecto riba nos den e articulo ki, cu enfoke riba e emocion miedo, aunke cu tur emocion ta importante. Mi ta spera di por inspirá y conscientisá esnan cu ta lesa over di esaki.

Nos ta pasando den temponan nunca antes bibá. Door di esaki nos no sá eigenlijk con pa haci den e momentonan aki, pasobra nos djies no tin experiencia cu cosnan manera un pandemia y crisis di e magnitud aki. Hunto cu esaki nos no sa eigenlijk tampoco con e futuro lo bai mustra mas. E realidad ta cu prome cu e pandemia tampoco eigenlijk e futuro tawata predecibel, pero door di nos confortabilidadnan, e cosnan cu nos a custuma cu ne, nos structuranan, nos tawata tin e ilusion cu e futuro ta predecible. Y na esaki nos tawata wanta, cu nos ta consciente di esaki of no. Algun di nos tawata tin e futuro mas positivo den su mente, y algun kizas mas negativo. Con cu ta, awor hopi, si no ta tur, nos structuranan a wordo kibrá.

Aworaki nos ta ser confronta cu un otro realidad cu promé, y esaki ta trece puro inseguridad cu ne. Nos djies sa cu nos mester “ flatten un curve” (y kizas ni esey nos por compronde bon kiko ta wordo bisa cu ne) y nos ta haciendo lo posible pa esaki ta un realidad bou di guia di nos gobierno y autoridadnan (cual no ta tur di nos, cu of sin rason valido, tin echt confianza cu ne). Y mi ta kere nos por bisa si cu den algun lugar den nos mes, nos sa cu e situacion aki ta bai pasa. Pero cuanto tempo e ta bai tuma? Nos no sa tampoco. Tur esey ta haci cu nos como ser humanonan, cu ta hopi bon den wanta na kiko ta bai pasa (den futuro) y ta confortabel den su structuranan sea bon of menos bon pa nos, pero "nonetheless" confiabel pasobra nos a custuma cu nan con cu ta, awor ta sinti pa gran parti nervioso y fastioso. Pasobra nada mas ta sigur. Mi ta making sense p'abo cu ta lesando? Spera cu si.

Bou di tur e inseguridad aki tin un emocion hopi básico cu jama miedo. Miedo ta algo cu nos no gusta papia di dje y mucho menos, sintié. Nos tin manera un miedo (tambe jamá resistencia) di e miedo, igual cu nos tin miedo di mayoria di nos otro emocionnan y of sentimentonan (manera dolor, tristesa, rabia). “Ami miedo? bo ta loco! Esey ta cos di...” of “mi ta confia den Dios, pues mi no tin miedo”. Cada un di e expresionnan aki por ta (mi no ta bisa cu semper e ta asina, pero por ta) ehempel di expresionnan unda cu un persona ta nengando e emocion y pues no ta presta atencion na kiko e ta eigenlijk sintiendo, of ta poni eynan pa e bai sinti (dus no a wordo sinti ainda, pero e ta manera wardando pa bo acepte).


https://www.bondia.com/comprondiendo-nos-mes-un-poco-mas-den-tempo-di-crisis-parti-2/


E realidad ta cu den un curpa saludabel y normal, emocion ta wordo sintí, mirá, reconocí un rato. Mastanto di nos no ta consciente di e proceso interno aki, pasobra e ta bai automaticamente. Hopi hende, sin cu nos sa (inconscientemente), ta pasa over di emocion, y dicidi cu e no tey, y ta kité asina di bai den nos consciencia. Y tin biaha nos sá (ta consciente) y toch ta dicidi cu no kier sinti e emocion y ta pasa asina tambe riba dje. Den ambos caso, consciente of inconscientemente locual ta pasa ta cu e emocion ta wordo reprimí. Personanan cu ta haci esaki structuralmente, cu 1 of mas emocion (y sentimentonan e.o.), ta personanan cu ta sufri di condicionnan manera depresion, den diferente grado, un mas cu otro, dependiendo tambe di varios otro factornan. Y lamentablemente, bo ta wak e patrono di reprimi emocion y sentimento, den culturanan completo manera por ehempel aki na Aruba (y sigur ful rond mundo).

Pero tur emocion, incluyendo miedo ta hopi valuabel y un aspecto natural di nos ser humanonan. Ora cu ta normal, miedo tey pa protehe nos y percurá pa nos keda na bida. E ta zorg por ehempel pa nos no bula asina asina for di un brug of e ta haci nos wak drechi, robes, prome cu crusa caminda. Pero ora e ta presente den exceso y bo no tin control natural di dje, e ora e por juist limitabo di biba e bida ey cu e ta eigenlijk yudando bo cu ne. Nada dimas di berdad no ta bon. Pero tambe esaki tin su funcion y no ta por nada e limitacion aki por tey. Por ehempel den un pasado bo a purba algo nobo y bo a end up hopi desapuntá y adolorí y a keda cu un sintí desagradabel. Kizas esaki tawata ún situacion hopi dificil mes, of varios situacionnan cu a duna resultado negativo. Esaki a pasa pasobra cu di un of otro manera, e emocion no a wordo procesa (pero reprimí) door di bo curpa mes. Akinan bo curpa a keda tene e memoria hunto cu e emocion den dje, cordé y a siña reacciona door di dunabo hopi miedo den cierto situacion nobo, pa purba protehebo di un posibel experiencia negativo atrobe y bo overload.

Tin casonan unda cu hendenan sa deal mihor cu emocionnan, y no ta reprimi nan (structuralmente). Den e casonan ey e personanan aki ta vlinder rond bibando nan bida "sin miedo", nos ta bisa e ora ey. Pero locual en realidad ta pasa, no ta cu un persona no ta sinti miedo of no tin miedo, pero cu e personanan aki a siña di nan mes of door di otronan con pa enfrenta e miedo di tal forma cu nan sá con pa validé, dune su lugar (nó pleitando cu ne), asina cu e no ta impidí nan den nan bida diario. Esey ta algo hopi great (haci nos jaloers tin biaha, of no?) (sinti jaloers tambe ta oke). Lamentablemente skills nan manera deal constructivamente cu miedo, no ta wordo siña den nos systema educacional regular te cu ami mes a conoce, y te ainda cu mi sa, no ta naturalmente presente den nos cultura, y ta bin mucho menos for di cas.

Door cu e miedo ta hopi halto mundialmente aworaki debí na e Coronavirus, eigenlijk nos ta wordo confronta cu cón nos a siña deal cu e emocion aki of no, con nos ta háci (actua, comportá) of no haci den relacion cu ne. Nos a letterlijk wordo obligá pa bai p'aden, y cu esaki casi no por evitá di wak nos mes un p'aden. Y kiko nos ta wak cu ta pasando ful rond di nos? Actonan mas violento of agresivo cu normal. Den otro palabranan comportacion destructivo como reaccion riba emocion envez di un response adecua y constructivo riba e emocion aki. Tur hende, tur cultura, tur nacion, tin nan mes un caminda di desaroyo, y ta ótro caminda den nan desaroyo personal (emocional). Dus sin husga hende, mi ta bai usa e siguiente ehempelnan. Un "simpel" gritá na bo pareha of yiunan of hende di edad (of ken cu ta), ta agresividad y un accion violento, y dalmento (di ken cu ta) ta agresividad y violencia tambe, pero di un otro kaliber. A lo menos cu b'a haci e cosnan aki sin haci bo mes of otronan dolor y daño, e ora e ta mas constructivo.


Comportacion agresivo por pasa serca personanan cu tawata demostra e comportacion aki caba prome cu crisis y aworaki ta demostré kizas mas ainda, y tambe serca personanan cu antes no tawata comporta asina, of no frequentemente. E comportacion aki ta bin, ami ta kere, básicamente, for di miedonan cu ta existi hopi tempo caba den personananan (deep down inside) y cu a acumulá den e curpa, y especialmente e inabilidad di deal constructivamente cu nan. Mi ta hopi sigur cu si esaki ta e caso serca bo, bo no ta echt consciente di e emocionnan cu tin den bo mes, of si bo tin algun consciencia, ainda no ta logra actua di otro forma den relacion cu e emocion aki. Ta dolor si esaki pasa, pero mi kier pa bo sa cu ta oke y comprendibel, pasobra corda cu bo djies no a siña deal mihor cu ne. E nó ta hustifica e acto doloroso si, comprendibel ta ótro cu hustifica. Y bo por kies den e momento aki pa na primer lugar sí bira consciente, y despues for di consciencia kies un comportacion diferente, maske con dificil of imposibel esaki por mustra. Pa esaki bo por bai serca profesionalnan serca ken bo ta sinti bo bon y cu ta scuchabo di berdad.


https://www.bondia.com/jurisky-geerman-parti-tres-comprondiendo-nos-mes-un-poco-mas-den-tempo-di-crisis2/


Tin di nos cu no ta actua persé agresivo den presencia di miedo, pero si ta sinti inconfortabel y tin dificultad pa conformá cu e situacion en general (acepta). Por ehempel ora Toque de Queda a wordo introducí, cual ta un medida rígido, y cu derrepente (asina e por a sinti, aunke a duna algun dia prome cu el a bai na vigor) a kita hopi libertadnan cu nos tawata tin. Ya nos tawata den un situacion unda nos no sa kiko ta bai pasa, y riba dje nos a wordo limitá tambe for di cosnan cu nos conoce y cu di un of otro forma tawata duna seguridad. E no ta straño viendo e situacion e ora ey cu e prome dianan di Toque de Queda e cantidad di hende cu a wordo detení tawata halto compará cu awor. Obviamente tur hende mester a custuma cu e reglanan nobo y parti di e custumber ta custuma cu tur e emocionnan cu nan a trece cu ne, cu bo ta consciente di esaki of no. Y pa esey a pasa (mas of menos) tawata mester di tempo. Esaki ta na nivel di comunidad, y si bo wak bo mes como individuo, mi ta sigur cu b'a sinti algun incomfortabilidad tambe pa por deal cu e cambionan. Toch?

Con cu bo a sinti of no sinti, actua of no actua en todo caso ta bisa algo dibo. No ta nada malo (ami en todo caso no ta husgabo), djies un observacion y informacion importante p'abo over di bo mes. Con precies ábo a sinti ora cu bo a tende di e limitenan cu lo a bai wordo poní? Y una vez cu nan a bai na vigor? B’a nota algun “kishikishi”, un tendencia pa “core haci algo”? Kizas bo reaccion tawata di rebeldiá? Y opiná delaster un cos negativo over di e desicionnan tumá? Actua rabiá? (Cual ta otro cu sínti rabia). Of kizas bo a preocupa hopi, "y awor con mi ta haci cu tal tal cos"? Y con cu ta cu b'a sinti y actua, con largo of cuanto tempo bo a keda den e estado aki? Prome cu bo a conformá y wak maneranan pa deal cu e situacion actual? Kizas áinda bo ta den un estado sumamente inconfortabel den algun parti di bo mes? B’a cuminsa come más of mas frequente? Cumpra jen di cos y jena bo cas?


P’ami, for di un punto di bista di sobrevivencia e ta lógico y hopi humano cu nos a, ban bisa, (masalmente) "go a little crazy". Corda, cu ta hopi cambio di una vez a bin y cu e curpa e ora mester di tempo pa procesá. Y serca mayoria mi ta kere e procesamiento lo logra cu tempo, y serca algun e kizas lo no ta asina (con dificil mes cu esaki ta pa mira). E no ta salubabel si, si nos keda haci asina y dus keda reacciona (inconscientemente) riba e kishikishi ey cu miedo por duna, di formanan “pretá” (verkrampt, obsesivo). Haci asina ta costa hópi energia, bo ta écht cansa bo mes haciendo cosnan for di “miedo miedo miedo”. Y esey nos no mester awor. Tin suficiente cos pasando caba cu ta "preta". Bo reaccion (inconsciente) for di e sentimento incomfortabel ta invitabo pa busca e ora ta kiko si bo mester. Abo y tur di nos mester di cosnan/ actuacionnan mas suave (menos preta). Pero kiko ta actuacionnan mas suave? Bo por pensa concretamente con esey lo por mustra p'abo den bo situacion individual?

Kiko mi kier bisa eigenlijk? Mi ta bisando cu e ta normal, pero toch no saludabel. Esey ta kindof contradictorio. Y si, mi kier bisa eigenlijk, cu nos curpa tá complex y ta jen di procesonan interno cu ta manera contradecí otro. Eynan, consciencia ta bin aden, y conoce nos mes mihor ta un hèrment hopi importante. Pasobra una vez bo siña wak bo reaccionnan riba bo emocionnan, manera miedo, bo lo ta capabel pa cambia e reaccionnan ey den response cu ta mas apropiá, mihor pa bo mes especialmente, y pesey pa otronan rond di bo tambe. Nos ta tende hopi biaha e conseho (for di bon intencion), pa mantene bo mes calmo. Esaki ta zona hopi facil, pero en realidad no ta asina pa tur hende. Mantene calma, ta un comportacion, un acto, den respuesta (no reaccion) riba e sentimentonan of emocionnan cu bo por ta sintiendo. Y manera m'a menciona prome, mastanto nos no a siña con pa haci esaki, pero e ta algo cu si no ta bin si su mes, nos por siña si ainda. Ami ta invitabo pa bo no ta streng cu bo mes, pero si mira cu bo ta síntiendo cosnan, cual ta normal. Sinti ta parti di locual ta hacibo humano.

Y si bo ta desea mas calma pero no ta logra di bo mes, bo por asercami pa guiabo cu formanan constructivo con pa deal cu e situacion aki cu tanto incertidumbre. Mi nomber ta Jurisky A. Geerman, y mi ta getraind y tin hopi experiencia den deal conscientemente cu emocionnan cu por sinti hopi fastioso, y cu ta dificil pa deal bon cu nan, sea di nos mes of di otronan. Tambe mi tin experiencia cu e comportamientonan menos adecua cu hopi biaha ta bin cu esakinan. Mi kier invitabo, pa usa e momento aki unda nos bida regular a wordo kitá for di nos abruptamente, pa siña relacioná mas constructivamente cu e aspectonan masbien desconoci nan aki cu ta parti di nos mundo interior. Mi kier sirbibo y ta spera cu mi por ta di algun asistencia na bo y nos comunidad, den yuda con pa navega e temporadanan aki mas trankilamente, y saludablemente. Mi kier yudabo pa bo zorg bon pa bo mes, especialmente zorg pa bo p'aden y brindabo maneranan con pa deal cu miedo e.o., pa awor, pero cu sigur lo sirbibo tambe pa despues ora e situacion aki pasa porfin.

Cu hopi amor,

Juri.


7 weergaven0 opmerkingen

Recente blogposts

Alles weergeven