Con importante e ta p'ami pa disfrutá di bida?

Proposito

Prome cu bo lesa mas, mi ta invitabo pa bo para kieto un rato riba kiko BIDA y BIBA ("life" y "to live") kermen p'abo.  Para kieto kermen por ehempel sinta lo mas comfortabel posibel den e momento aki, nota con bo rosea ta bai (liher of slow, con cu ta cu e tá ta oké, no mester manipulé). Haci esaki pa un paar di minuut. Awor, puntra bo mes: kiko bida kermen p'ami? kiko biba kermen p'ami? mi ta realmente bibando? Y mi ta invitabo pa bo purba warda pa e respuesta enves di activamente buske. 

----

Inner Work Aruba ta existi pasobra cu mi ta concede tur hende na Aruba (y henter mundo) e transformacion cu ami a pasa aden. Esaki ta en resumen un transformacion for di sobrevivencia of tiki bida pa BIBA! For di no ta mi mes pa hopi mas y desaroyando cada bez mas den tá mi mes. Y mas den amplio: Di skuridad pa claridad, di descontento pa contento, di dessatisfecho pa satisfecho, di depresivo pa bibo, di intrankilidad pa senerinada/ calma, di falta di comprension pa claridad mental, di blanco preto pa shinishi y hópi color, di agresividad y violencia pa paz y harmonia. Di pleitamento pa conexion. Di separacion pa contacto. Di no "care" pa "care". Di pensa chikito pa pensa mas espacioso. Di ta pegá den funcionamento pa flow y eficiencia.

E proposito di mas halto cu bo desaroyo personal ta sirbi den mi opinion y experiencia, ta e diferencia di un mundo cu of sin nos como humano aden. Di nos BIDA pues. E existencia di nos rasa humano ta depende di nos trabao interno: Si nos no por logra pa nos maneranan di trata otro y trata nos medio ambiente transformá, e ora manera tur hende awendia mi ta supone por compronde (pasobra David Attenborough ta splica e realidad den placa hopi chikito por ehempel den su documentario A life on our Planet), aki tempo nos como humanidad lo stop di existi.

 

Pero pensa riba salba mundo ta mayoria biaha muchu grandi y principalmente lew di nos. Pesey ami ta kere nos tin miedo di e palabra responsabilidad. Pasobra ora nos tende e palabra, tur cos ta sinti asina grandi y con nos por handle e magnitud y complehidad ey? E ta muchu, e ta abrumador...Pensa riba bo mes ta literalmente mas chikito of menos y unda mas influencia bo por tin. Y hasta esaki por sinti grandi y nos no tin gana den dje. Pero nos no tin di preocupa pa esey, pasobra trahando riba nos mes, di un forma natural, nos ta bira un persona cu ta biba (mas), y un persona cu ta biba ta naturalmente (automaticamente) un persona mas responsabel. 

Pues e pregunta grandi  y spantoso (cu nos lo NO ta directamente bezig cu ne, pero toch ta importante) ta: si e ta importabo pa nos rasa humano existi y keda beneficia y disfrutá bida riba e planeta aki of no. E mundo, naturalesa, ta demostra di por sigui. Esaki ta lógico si bo pense un tiki: su curpa ta hopi mas grandi cu nos pues e tin e capacidad di wanta un sla cu nos humanonan, cu ta djies 1 di e tanto habitantenan di dje, ta ocasiona. Tabata tin 5 extincion massivo caba den historia, esaki lo ta di 6 si nos sigui den e rumbo cu nos ta, y no logra cambia.

 

Pero un pregunta kizas mas relevante pa nos aworaki, mas chikito y manehabel ta: 

Con importante e ta p'ami como individuo EXPERIENCIA bida y BIBA aki na mundo, disfrutá di dje y beneficia di dje, den mi situacion actual, n'i maske con fastioso e por ta? 

 

Lesa bon, e pregunta no ta si bo sa con, djies con importante e ta. Anto cu djies e pregunta aki, bo por cuminsa serca bo mes. Y bo por acercé di un forma natural den e sentido di sin esfuerso pa p'afo, pero juist ful enfoca riba abo y bo proceso. Y for di kinan, for di ábo pues, lo tin impacto positivo riba tur ser rond y den e totalidad mundial (p'afo di bo). Mi ta kere universalmente tambe y kizas hasta multi-versal (esey ta si nan ta existi), pero mi no por bisa con significante e ta pa e totalidad di ser di 1 persona den un multitud di universo. Eynan si nos ta bira hopi chikito, pero ja, sin un atoom tampoco un elemento ta forma cu ta na e base di tur structura fysico/ materia.

 

 

 

Vision

Door di facilitá y guia e proceso di desaroyo den cual un persona inevitablemente y naturalmente lo transformá, e lo keda pega den conflicto cu su mes cada bez menos, y asina cu otronan y bida rond di dje. E lo ta (mas) contento y satisfecho. No pasobra e no ta sinti of no ta pasa den cosnan fastioso nunca mas. Pero pasobra el a siña maneha situacionnan y acepta nan como parti di bida, enves di bringa. Al mismo tiempo, e lo crea cada bez menos desorden (shit) den su bida. 

 

Y door cu e no tin cu pasa tanto tempo mas ta deal cu, of limpiando shit, e tin espacio pa mira kiko e ta cu di lo mas profundo di su ser e ta desea di trese den bida y háci esaki (crea), bibando manera cu for di su mas p'aden ta mandá pa e biba. Y henter mundo eigenlijk lo experiencia mas amor, paz, harmonia y trankilidad. Pakiko? Pasobra ora cu abo ta ken abo mester ta, no solamente abo ta profitá di e sentimento y consciencia di ta completo, sino tur hende y cosnan rond di bo. Cu bo kier mire of no, bo tín efecto riba ful bo alrededor.

 

Mi ta kere cu nos tur sa (for di experiencia of imaginacion) con e ta sinti pa ta den presencia di hendenan cu ta hopi nan mes: bo ta admira nan, nan ta motivabo pa abo ta ken bo ta, sin bisabo ken bo ta, nan ta confia den bo y den nan presencia bo ta sinti for di e berdad cu bo tin e den bo pa bira ken cu abo mester ta y bo ta sinti e importante cu bo ta, maske ta 1 persona den tanto bo ta mescos cu 1 granito di santo riba e beach y lama jen. 

 

Mescos cu un mata di mango p.e., niun "algo" ta bise cu e tin cu bira un mata di mango, pero esey, den bon tera, cu awa y solo, e ta bira si. Mandá door di su p'aden, y for di nada mas. Sin ningun control di un otro ser p'afor di dje pa e bira kiko e ta suppose di bira. E tá kiko e tá y punto. Durante su crecimento nos ta disfruta di dje. Promer pasobra nos ta mire crese, despues, pasobra nos por beneficia di su sombra, su holor dushi. Claro cu e muscanan cu e frutanan por atrae ta un reto pa nos. Y di otro banda, pa nan e ta nan cuminda y nan tambe ta profita. Y nos ta come di e mesun frutanan dushi aki tambe. Eigenlijk ningun strobando otro. Den biologia esaki ta jama un symbiose, cual ta un win-win situatie.

 

For di mi experiencia y mi abilidad di biba kizas limita ainda pero basta desaroya, tranformacion y desaroyo di personanan cu ta asina lew pa haci esaki, lo hiba na un Aruba mas sigur (safe) y ta aporta asina na un bienestar mundial, cu menos violencia y dolor. Pasobra ora nos ta mas nos mes, nos ta haci nos mes menos dolor, y "per difinitie" esey kermen cu nos ta haci nos alrededor y medioambiente consistiendo di tur bida humano y otro especienan y tur loke tin di ver cu bida, menos dolor tambe. Nos no mester destrui mas incontrolablemente for di dolor, den tur area y sentido. Nos lo kibra, respetuosamente locual djies no ta sirbi nos mas. Pasobra destruccion tambe ta parti di bida y necesario den algun caso. Wak e film "Wrack it Ralph" cu ta mustra esaki den un manera hopi simpel den mi opinion. 

 

Traha riba nos mes, tin como consecuencia un Aruba y un mundo mas saludabel internamente y cu lo resalta den forma natural pa p'afor. Un Aruba y un mundo mas conectá, pasobra nos a siña crea, sin mester pasa riba otro bida. Haciendo nos trabao interno, nos ta riba e caminda di desaroya nos mes como e creadornan cu nos ta. Creadornan madurá. Nos lo tin contesta riba:

 

Con mi por biba sin destrui esey cu ta dunando mi bida? 

 

Nos djies ta hopi jong den esaki awor ainda. Pero naturalesa mes a duna nos semper y lo keda duna nos e señalnan pa pone stapnan cu tin cu wordo poní pa un dia nos ta e creadornan bibando den harmonia cu naturalesa y nos mes un creacionnan. Enves di auto-destrui. Nos djies mester obedece e señalnan aki. Cual ta demostrá di toch no ta asina facil, pero den mi experiencia definitavemente posibel. 

Pero (idealmente) stapnan no por wordo poní for di un posicion di escasez ("tekorten"of "lack"/ "si mi (no) haci esaki e ora mi ta...(un bon of mal hende/ta wordo mirá/ haya sota/zundra of nan por haci mi famia algo of mi lo wordo mal mirá of...)". Envez, e tin cu bin di un posicion mas madurá. Y esaki ta encerá p'ami, cu abo, maske cu ya bo a jega y of a pasa edad (dia bieu) for di cual bo ta wordo considerá adulto (18 aña) por admiti na bo mes cu bo NO SA algo. Di e forma aki ta honesto cu bo mes, y asina aki (poco poco si mester) stop di pretende y haci locual cu ta realmente necesario pa jega unda bo ta klop pa bo jega. Bo por responde na emocionnan fuerte y sentimentonan fastioso, enves di reacciona automaticamente y haci cosnan cu bo sa cu no ta bon, pero no ta tuma espacio pa mira otro solucion.  

 

Si bo nota cu bo ta pretendiendo, bo NO ta madurá eynan ainda, y no tin berguensa den esey, pero mester ta real. Un mucha chikito (ainda) no ta apto pa core un auto, toch? Esey ta super peligroso, toch? Pues abo/ nos tampoco ta apto pa cierto cosnan (ainda) tin biaha, maske nos ta den nos edad mayor. Misa cu nos kier por tur cos (conbin, ah?). Y nos ta sinti masbien tambe cu nos méster sa tur cos principalmente si nos ta adulto di edad y nos tin un organisacion (famia, klas of un pais p.e.) pa "run". Pero pretende di por ora no por, ta haciendo primordialmente abo, bon? Bo ta drumi bon? Bo famia ta contento cu bo? Abo mes ta écht contento?

 

Madurez ta encerá pues un posicion di honestidad y realidad hacia bo mes primeramente. Y unda bo no ta ainda, no pa bo sinti bo mes avergonzá di dje, pero tampoco eigenlijk pa bo bai actua hacia e mundo for di eynan. Mihor ta pa bo traha riba bo mes prome, jena e escasez, cu ta forma e motivacionnan cu inconscientemente ta drive bo accionnan. Actua pa bo mes prome, cu tuma responsabilidadesnan riba bo cu no ta klop ainda cu unda bo ta y actua pa p'afor den e mundo. Mas aplicabel den nos bida mi ta kere cu por lo menos nos por dicidi di dedica un parti significante di nos tempo na esaki, banda di e responsabilidadnan cu nos a tuma riba nos (den cierto caso, maske cu nos no tabata cla pé). Y di e forma aki bira poco poco menos irresponsabel.

 

Y for di e posicion aki, actua hacia e mundo. Pasobra sino bo ta sirbiendo bó interesnan énves di bo p'afor (só). Sin cu bo ta consciente. Y esaki no ta hiba na e mihor desicionnan concerniendo un y tur. Pasobra bo curpa semper lo pone abo prome. Pero hopi biaha nos ta mira cu ta wordo pretendí (consciente of inconscientemente) for di un supuesto bon intencion, cu ta sirbi su p'afor só (mi pais, mi hendenan, e bieunan, e muchanan, esunnan cu menos recurso). No comprondemi malo. E no ta cu bo no por sirbi bo p'afo. Pero bo TIN cu zorg pa bó interesnan sikiera banda di sirbi bo p'afo--> bo méster take care di bo escaseznan.

 

E cosnan aki méster wordo sirbí den bo. Y tambe e interesnan p'afo di bo mes por wordo sirbí e ora. Pasobra si bo no por take care di bo mes, con bo por take care di otronan? No haci manera bo ta sirbiendo interes di p'afor di bo só, mientras cu esunnan p'aden di bo no ta wordo sirbí mes. Esey mi ta jama falta di respet (pa bo mes!), y esey ta e base tambe di corrupcion (den tur hende, no politiconan so). Pakiko? Pasobra una bez ankra den bo mes, bo ta fuerte y menos corrumpibel, for di respet pa bo ser. Pero no ta nada si no ta asina ainda. Ata aki un caminda pa desaroyá nos mes. Y no tin ningun berguensa, juist hopi realidad, naturalesa y forsa, den esaki.

Mi kier invitabo pa para kieto un rato na kiko mi a skirbi y nota...sinti. Bo no mester ta deacuerdo, sinti. Y mi ta spera cu bo por sintibo liber pa hacimi pregunta acerca, pa bo compronde mihor si asina bo ta desea, kiko mi ta tratando di bisa. Mi lo ta mas cu contento pa interactua y conversá cu bo. 

-☺♥-

 

 

 

Valornan

* Amor, cariño y suavidad. 

* Integridad. 

 

* Esfuerzo y responsabilidad

* Naturalesa

* Respet

*Mag di haci fout.

 

* Calidad

 

* Profundidad

 

* Realidad

* Soberania (Zelfredzaamheid).  

 

* Contacto/conexion

* BIDA

 

* Fun! Huego, plezier :-D

 

* Experimento.  

* Openness.

* Sostenibilidad y durabilidad.